2 Corinthians 12

ARI, ai suaiki sota katepa on ia. Ari so, i pan kapareda kaudial akai o kadiarok kai ren Kaun o.

I asa duen aramas amen ren Kristus, mon saunpar eisok paieu; i sasa, ma a mi nan war a, de ma a mi likin war a, i pil sasa, Kot me kotin mani, i aramas o, me peukadala lel nanlan kasilu.

O i asa, iei aramas o, ma a mi nan war a de likin war a, i sasa, Kot me kotin mani.

I me peukadalan paradis, wasa a ronadar kasoi kai, me sota muei on aramas amen en inda.

I me i pan suaiki; a pein nai sota pan suaiki meakot, ai luet eta.

A ma i men suaiki pein nai, I sota pan pweipwei, pwe i pan lokaia melel. Ari so, i sota pan wia, pwe amen ender wia kin ia me lapa san duen a kin kilan ia o duen a kin ron ia.

A pwe i ende aklapalapaki kaudial kapuriamui kai, tuka teketek pot mi nan uduk ai, iei nain Satan, me kin dokodoko ia, pwe i ende aklapalap.

Pan sile pak i nidinid on Kaun o, en kotiki san ia me.

I ari masani on ia: Ai mak itar on uk, pwe manaman ai kin sansal ren me luet akan. Nan i me i pan suaiki ai luet akan, pwe manaman en Kristus en kotikot re i.

I me i perenki ai luet akan, o so konekon, o ansau apwal, o kamekam, o patau pweki Kristus, pwe ma i luet, nai me kelail.

Nai wialar pweipwei men, I me komail kare on ia, mak eta, komail en kapina kin ia, pwe i sota tikitik san wanporon lapalap akan; ari so, sota meakot nai.

Pwe manidi en wanporon wiauier nan pun omail ni kanonama melel o ni kilel akan, o ni men kapuriamui kan, o ni manaman akan.

Pwe nin da, me komail tikitikki san momodisou tei kan, ele iet eta: I sota katoutoui kin komail meakot? Komail ari makeki on ia sapun wet.

Kilan, i onoper pwar won komail kasilepak, o i sota pan kaponede komail, pwe i sota kin rapaki me noumail, a komail. Pwe kaidin seri kan en naka penan me wia ir ada, a me wia ir da on seri kan.

A i mauki melel kiki wei meakaros, pil pein nai on nen omail, i sota insenoki, ma omail pok on ia tikitik san ai limpok lapalap on komail.

Ari i eta, i sota kaponedeer komail; a pweki ai lolekon, i kaloedier komail.

De iaduen, i adia san amen komail ekis ren me i kadar won komail er?

I poeki ren Titus ap kadar won komail pil ri atail ian i. Ari da, Titus pitia san komail meakot? Kit so aluki nen ota de ni lip ota?

Ansau warai me komail kiki on me se pan pur on, kapunala pein kit on komail. Kit kin lokaia ki Kristus mon Kot. Kompok kan, mepukat karos kin wiaui, pwen kamauiada komail.

Pwe i masak ni ai pan pwar won komail, me i sota pan diar komail, duen me i mauki, o komail pil sota pan diar ia, duen me komail mauki. Ele kapei lokaia, o peirin, o makar, o akamai, o kawaikoto, o lidou monin, o aklapalap, o moromoron mi re omail.

Pwe ni ai pan pure won komail, ele Kot pan kotin kanamenok kin ia komail, o i pan insensuedeki me toto, me wiadar dip mas o, ap sota kalukila ar samin, o nenek, o dodok sued, me re wiadar.